Ciao ciao, Alitalia! Kompania historike italiane ka bërë të ditur se nuk do të lëshojë më bileta, duke ndezur kështu një numërim mbrapsht prej vetëm pak javësh, derisa avionët me linjat e njohura të kuqe dhe të gjelbra, të zhduken nga qielli një herë e përgjithnjë. Kompania ajrore në pronësi të shtetit, do të zëvendësohet në tetor nga ITA, një kompani më e vogël dhe me logo të ndryshme, por shërbimi që dikur mbartte krenarinë, stilin dhe kuzhinën italiane, për të mos përmendur papën, në të gjithë cepat e planetit, do të jetë zhdukur. Ndërsa zhdukja e Alitalias mund t’i sjellë një ndjesi humbjeje shumë italianëve, ajo nuk vjen aspak si surprizë. Kompania ajrore ka shpenzuar dekadat e fundit duke qëndruar në prag të Kolapsit ndërsa autoritetet janë stërmunduar ta mbajnë në jetë atë me aleanca me investitorë dhe kompani të tjera globale. Por gjithcka vetëm sa zgjati agoninë e saj. E themeluar 74 vite më parë, Alitalia, dikur njihej nga italianët si Freccia Alata, do të dalë tani në pension një herë e mirë.