Ish-zëvendësshefi i Misionit të OSBE-së në Kosovë, Edward Joseph, e ka përshkruar situatën politike në Kosovë si “katastrofë” dhe “krizë artificiale”. ‘Pse e quaj artificiale? Sepse në Kosovë nuk kemi një situatë ku elektorati është i ndarë dhe rezultati zgjedhor është shumë i ngushtë. Ka pasur një rezultat të qartë zgjedhor dhe ai i ka dhënë përgjegjësinë Albin Kurtit që të udhëheqë proceset për ta themeluar plotësisht qeverinë e Kosovës” – është shprehur Joseph në një intervistë për Radio Kosova. Sipas tij, Kurti ka pasur përgjegjësi për të çuar përpara procesin institucional, përfshirë edhe detyrimin kushtetues për zgjedhjen e presidentit. “Dhe kryeministri Kurti ka dështuar plotësisht në përmbushjen e kësaj përgjegjësie. Prandaj kjo është një krizë politike artificiale dhe është katastrofike. Ka pasoja serioze si brenda vendit për shkak të kaosit institucional dhe vakuumit që mund të krijohet”, u shpreh ai. Ish-zyrtari amerikan dhe njohësi i çështjeve të Ballkanit nënvizoi rëndësinë që posti i presidentit të mbahet nga një figurë që ka ndërtuar besim me administratën amerikane dhe se do të preferonte sërish Vjosa Osmanin për këtë aspekt.