Pas ngërçit me pagat në sistemin e drejtësisë, administrata e gjykatës së Apelit, e Dhomës Civile dhe Penale në Gjykatën e Tiranës kanë nisur bojkotin dhe ka bllokuar shërbimet. Punonjësit dhe sekretarët e gjykatës kanë ndërprerë shërbimet në pritje të pagave të muajit gusht, të cilat ende nuk janë ekzekutuar. Administrata ka njoftuar kryetarin e gjykatës, ndërsa punonjësve u është bërë me dije se një qëndrim pritet pas mbledhjes së kryetarëve të gjykatave këtë të martë në Gjykatën e Lartë. Ndërkohë, ngërçi financiar pritet të diskutohet edhe në sistemin e prokurorisë. Prokurori i Përgjithshëm, Olsian Çela, ka thirrur në takim drejtuesit e prokurorive të rretheve, Shoqatën e Prokurorëve dhe anëtarët e Këshillit të Lartë të Prokurorisë. Problematika u krijua pasi Kuvendi nuk miratoi brenda 31 korrikut formulën e re të pagave të magjistratëve, pas kërkesës së Gjykatës Kushtetuese. Në mungesë të një zgjidhjeje ligjore, KLGJ dhe KLP përcaktuan një pagë të re referuese prej 222 mijë e 425 lekësh, së bashku me shtesën për nivelin e kualifikimit. Megjithatë, Ministria e Financave nuk ekzekutoi listëpagesat me rritjen e re, duke argumentuar se përcaktimi i formulës së pagave është kompetencë e Kuvendit. Dy ditë më parë kryeministri Edi Rama tha se dera e Thesarit të Shtetit ku kanë mbetur të bllokuara pagat, nuk mund të hapet me forcë.