Banka Botërore rishikoi me ulje ecurinë e ekonomisë shqiptare. Në raportin e fundit të Perspektivës Ekonomike Globale, Banka parashikon që prodhimi i brendshëm bruto i vendit tonë të zgjerohet me 3.4 për qind, nga 3.8 që vlerëson se ka qenë rritja në vitin 2025. Parashikimi reflekton përkeqësimin e klimës ekonomike globale pas tensioneve të reja gjeopolitike dhe rritjes së çmimeve të energjisë. Sipas Bankës Botërore, ekonomia shqiptare pritet të përshpejtohet sërish në vitin 2027 me një rritje prej 3.7 për qind, ndërsa në vitin 2028 rritja parashikohet në 3.6 për qind. Në nivel rajonal, Ballkani Perëndimor pritet të ketë një performancë më të mirë se një vit më parë. Rritja ekonomike e rajonit projektohet në 2.9 për iqnd për vitin 2026, nga 2.6 për qind në vitin 2025. Kosova mbetet ekonomia me ritmet më të larta të zgjerimit, me një rritje të parashikuar prej 3.7 për qind.