Pas disa muajsh në kërkim, është arrestuar në Krujë 49-vjeçari Ylli Zalla, i akuzuar për përfshirje në atentatin e Rinasit në nëntor të një viti më parë, ku mbeti i vrarë Gilmando Dani dhe Muçi Shaljani. Ministri i Brendshëm, Besfort Lamallari ka ndarë pamjet nga arrestimi i Zallës në Krujë. Operacioni u zhvillua nga Forcat Speciale RENEA, Drejtoria e Forcës së Posaçme Operacionale, strukturat operacionale të Policisë Tiranë dhe Komisariati i Policisë Krujë. Ylli Zalla u lokalizua dhe u kap në një zonë të pyllëzuar.Në momentin e arrestimit, sipas policisë, i shumëkërkuari ka qenë i armatosur me kallashnikov dhe 3 krehra. Arrestimi vjen një ditë pas shpërthimit me tritol në banesën e Zallës, ku edhe u dogj automjeti i tij i parkuar. Për këtë ngjarje, policia u njoftua nga bashkëshortja e 49-vjeçarit, e cila ndodhet në Itali. Ndërkohë, autoritetet kanë lënë të hapur edhe pistën se eksplozivi mund të jetë vendosur nga vetë Zalla.