Evropa po përgatitet të mbrohet përballë një sulmi të mundshëm nga rusia me një plan të sofistikuar që mbulon katër shtylla; mburojë ajrore, mburojë hapësinore, mur dronësh dhe mbikëqyrje kufijsh. Pas inkursioneve të përsëritura ajrore të Moskës që kërcënojnë sigurinë e Evropës, kontinenti tani është në gatishmëri. Vendimi vjen pas një sërë incidentesh në të cilat kufijtë dhe aeroportet e Evropës janë testuar nga dronë të paligjshëm. Javët e fundit, Evropa ka qenë dëshmitare e përballjeve me avionë luftarakë rusë, dronë misteriozë dhe aktiviteteve të koordinuara sabotimi që kanë paralizuar operacionet në aeroportet kryesore. Më herët këtë muaj, Presidentja e Komisionit Evropian Ursula von der Leyen bëri thirrje për një sistem mbrojtës ajror me shumë shtresa që mund të përballojë një valë inkursionesh me dronë të nisura nga Rusia. Komisioni Evropian tani ka propozuar katër projekte kryesore mbrojtëse evropiane, duke përfshirë një sistem kundër dronëve dhe një plan për të fortifikuar kufirin lindor, për t'u mbrojtur përballë Rusisë deri në vitin 2030. Planet janë që të krijohet një Mburoja Ajrore Evropiane, e cila do të garantojë mbrojtje nga raketat dhe kërcënimet e tjera ajrore. Ndërkohë, do të krijohet edhe një Mburojë Hapësinore Evropiane për të mbrojtur asetet dhe shërbimet hapësinore të bllokut. Dhe vendet në krahun lindor të NATO-s do të ndërtojnë një sistem mbrojtës ajror shumështresor që do të ndihmojë në zbulimin e hershëm të dronëve dhe rrëzimin e tyre. Krahas nismës së dronëve është njoftuar edhe një program më i gjerë "Eastern Flank Ëatch" i projektuar për të forcuar mbrojtjen ajrore dhe tokësore përgjatë kufirit të BE-së me Rusinë deri në fund të vitit 2028. Deri më tani, BE nuk ka dhënë një vlerësim konkret se sa mendon se do të kushtojnë projektet kryesore.