Gjykata e Posaçme Kundër Korrupsionit dhe Krimit të Organizuar ka lënë në fuqi masën e sigurisë “arrest në burg” për 31-vjeçarin Xhuljano Hoxha, i ekstraduar një ditë më parë nga Britania e Madhe drejt Shqipërisë. Hoxha dyshohet se është pjesë e një grupi kriminal të përfshirë në kultivimin e rreth 870 kilogramëve kanabis në Drenovicë të Beratit, aktivitet i zbuluar gjatë një operacioni të zhvilluar në nëntor të vitit 2022. Hoxha u prangos në Angli në tetor të vitit të shkuar, ndërsa arresti me burg u caktua prillin e kaluar nga Gjykata e Posaçme. Operacioni i vitit 2022 në Berat çoi në ndalimin e 105 personave, mes tyre 95 gra të punësuara për pastrimin e kanabisit. Droga kultivohej në një kompleks serrash në pronësi të Hamdi Dylit, i ndarë në katër pjesë me nga rreth dy dynym secila. Në kuadër të hetimeve u arrestuan 11 persona, ndërsa nën hetim u vunë edhe 57 efektivë të Policisë së Beratit, përfshirë drejtues të lartë. Shtatë punonjës policie u përjashtuan përfundimisht nga radhët e uniformave blu.