Shpenzimet ushtarake rendisin Serbinë të parën në Ballkanin Perëndimor krahasuar me vendet e tjera. Por ndërsa Vuçiç e ka fokusuar një pjesë të mirë të buxhetit për armatim, një tjetër lëvizje po ndërmerret nga qeveria e tij, që po përgatitet për rikthimin e shërbimit të detyrueshëm ushtarak pas më shumë se një decade. Nisma, sipas mediave serbe, ka për qëllim forcimin e kapaciteteve mbrojtëse në ushtri. Shërbimit të detyrueshëm ushtarak do t’i nënshtrohen burrat e moshës 18 deri në 30 vjeç, ndërsa ky shërbim do të mbetet vullnetar për gratë. Ministri i Mbrojtjes, Bratislav Gašić, pohoi se afati stërvitor për rekrutët do të jetë 75 ditë. “Është bërë gjithçka e nevojshme që ne të mund të kthejmë shërbimin e detyrueshëm ushtarak. Kemi bërë analiza dhe teste të panumërta, duke filluar me kohën optimale që këta të rinj të marrin trajnim bazë ushtarak”, tha ai ndërsa sqaroi se të gjitha ata që do ta kryejnë këtë shërbim do të paguhen. Sipas draftit paraprak është planifikuar që 60 ditët e para rekrutët do të flenë në kazermë dhe 15 ditë do të jenë në pozicione kampi në strukturën e stërvitjes. Gašić e përshkroi vitin 2025 si të vështirë, por jashtëzakonisht të suksesshëm për Ministrinë e Mbrojtjes dhe Ushtrinë Serbe.