Rusia duket se po rekruton shtetas kubanë për të luftuar me ushtrinë e saj në Ukrainë, tregon një hulumtim i BBC. Në shtator dhe tetor 2023, detaje të pasaportave të mbi 200 kubanëve që dyshohet se iu bashkuan ushtrisë ruse, u zbuluan në internet nga një platformë pro-ukrainase e quajtur InformNapalm. Detajet e pasaportës u morën duke hakuar emailet e një oficeri rekrutimi ushtarak rus në Tula, në jug të Moskës. Një kërkim në Facebook ka treguar se 31 nga emrat e përmendur nga platforma ukrainase, përputhen me llogaritë e personave që janë në rusi ose janë të lidhur me ushtrinë ruse. Disa, për shembull, kanë postuar foto të tyre të veshur me uniformë ushtarake ruse, ose kanë postuar foto nga vende që mbajnë shenja rrugore ruse ose tregojnë targa automjetesh ruse. Të tjerë e përmendin Rusinë si vendbanimin e tyre aktual. Shumë nga ata përdorues të Facebook filluan të postonin përmbajtje të lidhura me Rusinë në gjysmën e dytë të 2023, duke treguar kështu se kur mund të kenë mbërritur në vend.