Kryeministri Edi Rama mori pjesë në takimin vjetor të Këshillit Koordinues të Diasporës, ku tha se kontributi financiar i diasporës në Shqipëri është rritur me 100 milionë euro dhe ku komunikoi edhe arritjet në disa drejtime të strategjisë së ndërtuar në bashkëpunim me shqiptarët jashtë atdheut. Së pari, Kryeministri renditi përmirësimin e imazhit ndërkombëtar të Shqipërisë. RAMA - Jam shumë krenar për faktin që ne kemi arritur t’u mundësojmë të gjithë shqiptarëve duke filluar nga ata që jetojnë jashtë vendit, atë që e kishin të pamundur deri jo shumë kohë më parë shqiptimin me plot gojën të emrit shqiptar dhe përgjigjen me plot gojën “jam shqiptar” ndaj pyetjes se nga je. Një përgjigje më e thjeshtë dhe më e natyrshmja në këtë botë që shqiptarët e kanë pasur, jo të lehtë ta artikulojnë për shkak shumë paragjykimeve ndaj tyre, por edhe për shkak të mungesës së një sfondi të ofruar nga vendi amë që të mund tu jepte atyre qetësinë, sigurinë dhe krenarinë e të thënit që jam nga Shqipëria.