Shqipëria duket se është kthyer në një destinacion të preferuar për ushtrimin e prostitucionit nga shtetaset e huaja, ku një tjetër rast është goditur nga policia në Durrës, ndërsa u arrestuan një armene dhe u procedua penalisht një peruane si dhe shqiptare. Gruaja 52-vjeçare nga Armenia sipas policisë, dyshohet se ishte organizatorja e këtij aktiviteti kriminal. Dy të akuzuarat kishin marrë me qira dy apartamente, një në zonën e Vollgës në lagjen numër 1 dhe një tjetër në atë të plazhit në lagjen numër 13 të cilat i shfrytëzonin për prostitucion. Gjatë ndërhyrjes së forcave policore, dy gratë e huaja refuzuan të hapin dyert e apartamenteve. U desh ndërhyrja e forcave zjarrfikëse që agjentët e policisë të hynin brenda. 52-vjeçarja nga Armenia akuzohet për veprën penale “Prostitucioni” dhe “Përshtatja e ambienteve për prostitucion”, ndërsa 22-vjeçarja peruane dhe tre shqiptaret vetëm për prostitucion. Në cilësinë e provës materiale u sekuestruan 2 pasaporta të shtetaseve të huaja, shuma parash, karta telefoni, bllok shënimesh etj.