Pas fitores së islamistëve në Siri, Rusia po vlerëson se cfarë duhet të bëjë me bazat e saj ushtarake atje. A do t'i humbasë ajo ato pas fitores së rebelëve dhe arratisjes së Bashar Al Assadit? Zëdhënësi i presidentit rus, Dmitri Peskov, tha të hënën se, është "herët" të flitet për këtë. Mediat ruse njoftuan se islamistët e drejtuar nga grupi Haiat Tahrir al-Sham, kanë garantuar sigurinë e bazave ushtarake ruse por konfirmim nga burime të tjera nuk ka. Rusia ka dy baza Siri, bazën e marinës në Tartus në Detin Mesdhe, një trashëgimi e Bashkimit Sovjetik, dhe që nga viti 2015 edhe aeroportin ushtarak në Hmeimim. "Deri tani ndonëse shihen aktivitete të avionëve transportues në Hmeimim, nuk mund të bëhet fjalë për përmasa që do të nënkuptonin një evakuim të plotë", thotë për DË Gustav Gressel, ish-ekspert në këshillin evropian të marrëdhënieve me jashtë. Anijet ruse vërtet ndodhen në Mesdhe "për manovra", por ato nuk janë larg Tartusit. "Unë mendoj, se pas kuintave Rusia do të negociojë për t'i mbajtur bazat në Siri", thotë ai. "Nëse do të hiqej dorë prej këtyre bazave, në fakt do të duhej të kishte nisur evakuimi”. Ekspertët besojnë se baza e marinës në Tartus është për Rusinë "më e rëndësishme në aspektin strategjik", sepse "që andej forca e Moskës mund të projektohet në Mesdhe". Baza e aviacionit në Hmeimim ka qenë për Moskën e rëndësishme, për të mbrojtur regjimin e Assadit nga rebelët. Por tani kjo arsye bie.