Policia Rrugore e Tiranës ka vijuar kontrollet në akset kryesore dhe rrugët me frekuentim të lartë, me fokus rritjen e sigurisë dhe parandalimin e aksidenteve. Gjatë kontrolleve, 32 persona janë arrestuar për vepra penale në fushën e qarkullimit rrugor. Mes tyre, dy drejtues automjetesh kanë tentuar të korruptojnë punonjësit e Policisë, pasi janë konstatuar duke drejtuar automjetin në gjendje të dehur. Ndërkohë, gjatë kësaj periudhe janë vendosur në total 13. 467 masa administrative. Nga këto, gati 5 mijë masa janë vendosur për shkelje që lidhen me sigurinë rrugore, ndërsa mbi 7800 gjoba për shkelje të rregullave të ndalimit, pushimit dhe qëndrimit. Gjithashtu, janë ndëshkuar 1093 drejtues motomjetesh për mosrespektimin e përdorimit të kaskës mbrojtëse, 418 drejtues për mosvendosjen e rripit të sigurimit dhe 309 për përdorimin e celularit gjatë drejtimit të automjetit.