Kryeministri izraelit Benjamin Netanyahu do të takohet me një grup të vogël ministrash të lartë për të diskutuar planet që ushtria të marrë kontrollin e më shumë territori në Gaza, pavarësisht kritikave në rritje brenda dhe jashtë vendit për luftën gati dyvjeçare atje. Netanyahu do të mbledhë kabinetin e sigurisë pas një takimi tre-orësh këtë javë me kreun e ushtrisë, të cilin zyrtarët izraelitë e përshkruan si të tensionuar, duke thënë se shefi ushtarak kishte shtyrë zgjerimin e fushatës. Sondazhet e opinionit tregojnë se shumica e izraelitëve duan që lufta të përfundojë me një marrëveshje që do të shihte lirimin e pengjeve të mbetura. Qeveria e Netanyahut ka këmbëngulur në një fitore të plotë ndaj grupit militant palestinez Hamas. Ideja e forcave izraelite që hyjnë në zonat që nuk i kontrollojnë aktualisht në enklavën e shkatërruar palestineze ka shkaktuar alarm në Izrael. Nëna e një pengu të enjten u bëri thirrje njerëzve të dalin në rrugë për të shprehur kundërshtimin e tyre ndaj zgjerimit të fushatës. "Dikush që flet për një marrëveshje gjithëpërfshirëse nuk shkon dhe pushton Gazën, nuk i vë pengjet dhe ushtarët në rrezik", shkroi Einav Zangauker në platformën X në komentet drejtuar Netanyahut. Familjet e pengjeve i kërkuan Shefit të Shtabit të Ushtrisë, Eyal Zamir, të kundërshtojë zgjerimin e luftës dhe i bënë thirrje qeverisë të pranojë një marrëveshje që do t'i jepte fund luftës dhe do të lironte pengjet e mbetura.