Presidenti i Turqisë, Rexhep Taip Erdogan vijon të kritikojë ashpër Izraelin për sulmet e pamëshirshme ndaj palestinezëve në Gaza, aty ku në më pak se tre muaj kanë humbur jetën më shumë se 20 mijë civilë. Duke folur nga Ankaraja, Erdogan krahasoi kryeministrin izraelit, Benjamin Netanyahu me Hitlerin, për të sjellë në vëmendje gjenocidin ndaj hebrenjve gjatë luftës së dytë Botërore. “Kryeministri izraelit Benjamin Netanyahu nuk është aspak ndryshe nga Adolf Hitleri dhe sulmet e ushtrisë izraelite në Rripin e Gazës janë të njëjta me trajtimin e hebrenjve nga nazistët. Masakrat ndaj civilëve palestinezë duhet të marrin fund një orë e më parë”, tha ndër të tjera Erdogan. Presidenti turk nuk I kurseu kritikat as për vendet perëndimore, të cilat mbështesin Izraelin në luftën kundër Hamasit në Gaza. Erdogan u shpreh se pikërisht mbështetja perëndimore është ajo që I jep zemër Izraelit për të vijuar bombnardimet intensive në enklavën palestineze. Erdogan përsëriti gatishmërinë e Turqisë për të mirëpritur akademikët dhe shkencëtarët që u përballën me persekutimin për shkak të pikëpamjeve të tyre për konfliktin në Gaza.