Pas 21 muajsh luftë, shpresat për një armëpushim të ri në Rripin e Gazës po rriten. Kryeministri izraelit, Benjamin Netanyahu, ka mbërritur në Uashington, për një takim të rëndësishëm me presidentin amerikan, Donald Trump. Trump u tha më herët gazetarëve se do të jetë “shumë i prerë” me Netanyahun për përfundimin e konfliktit. Ai tha se mendon se “do të ketë një marrëveshje” këtë javë. “Po punojmë për të arritur marrëveshjen që është diskutuar, sipas kushteve të dakordësuara”, tha në anën tjetër Netanyahu. “Unë besoj se biseda me presidentin Trump mund të ndihmojë në avancimin e këtij rezultati, për të cilin të gjithë shpresojmë”, tha ai përpara se të nisej drejt SHBA-së. Izraeli dhe Hamasi nisën bisedimet jodirekte për një propozim të SHBA-së, i cili parashikon një armëpushim 60-ditor dhe lirimin e pengjeve, të dielën në Katar. Megjithatë, nuk është ende e qartë nëse dallimet kryesore që kanë penguar vazhdimisht arritjen e marrëveshjes, mund të kapërcehen. Vizita e Netanyahut në Shtëpinë e Bardhë është e treta e tij që kur Trump u rikthye në detyrë në muajin janar. Ajo vjen pas vendimit të Trumpit për t’u bashkuar me luftën e Izraelit kundër Iranit, duke sulmuar centralet bërthamore iraniane. Pas ndërmjetësimit të një armëpushim mes këtyre dy vendeve, Trump bëri të ditur se fokusin e ka tani në përpjekjet për të ndalur luftën mes Izraelit dhe Hamasit.