Kryeministri izraelit Benjamin Netanyahu i ka kërkuar presidentit të Izraelit t'i japë faljen atij në mesin e një procesi të gjatë gjyqësor ku ai akuzohet për korrupsion, që e ka ndarë thellë vendin. Në një deklaratë të dielën, zyra e kryeministrit tha se Netanyahu kishte paraqitur një kërkesë për falje në departamentin ligjor të Zyrës së Presidentit. Zyra e presidentit e quajti atë një "kërkesë të jashtëzakonshme", që mbart me vete "implikime të rëndësishme". Netanyahu është i vetmi kryeministër në detyrë në historinë e Izraelit që del në gjyq, pasi u akuzua për mashtrim, shkelje të besimit dhe pranim ryshfeti në tre raste të ndara duke e akuzuar atë për shkëmbim favoresh me mbështetës të pasur politikë. Ai ende nuk është dënuar për asgjë. Kërkesa vjen disa javë pasi Presidenti amerikan Donald Trump i kërkoi presidentit të Izraelit të falë Netanyahun. Në një deklaratë, Netanyahu tha se gjyqi e ka ndarë vendin dhe se një falje do të ndihmonte në rivendosjen e unitetit kombëtar. Ai tha gjithashtu se kërkesa që ai të paraqitet në gjykatë tre herë në javë është një shpërqendrim që e bën të vështirë udhëheqjen e vendit.