Kryeministri izraelit Benjamin Netanyahu hyri në një gjykatë në Tel Aviv të martën për të marrë pjesë për herë të parë në një gjyq të gjatë për korrupsion që ka të ngjarë ta detyrojë atë të endet mes sallës së gjyqit dhe dhomës së luftës për javë të tëra. Netanyahu mbërriti rreth orës 10 të mëngjesit në gjykatë ndërsa disa dhjetëra protestues u mblodhën jashtë saj, disa prej tyre mbështetës dhe të tjerë duke kërkuar që ai të bëjë më shumë për të negociuar lirimin e rreth 100 pengjeve ende të mbajtura nga Hamasi në Gaza. Izraeli po zhvillon një luftë në Gaza kundër grupit militant palestinez Hamas prej më shumë se një viti, periudhë gjatë të cilës Netanyahut i ishte mundësuar një shtyrje për fillimin e paraqitjeve të tij në gjykatë. Por të enjten e kaluar, gjyqtarët vendosën se ai duhet të fillojë të dëshmojë. I akuzuar për ryshfet, mashtrim dhe shkelje të besimit, Netanyahu do të dëshmojë tri herë në javë, tha gjykata, pavarësisht luftës në Gaza dhe kërcënimeve të reja të mundshme që vijnë nga trazirat më të gjera në Lindjen e Mesme, duke përfshirë Sirinë fqinje. Netanyahu u padit në vitin 2019 në tre raste që përfshinin dhurata nga miq milionerë dhe për pretendimin se kishte kërkuar favore për manjatët e medias në këmbim të mbulimit të favorshëm. Ai mohon akuzat.