Marjana Koçeku, ish-deputetja e PS që zgjodhi të jetë e pavarur në Kuvend, I ka drejtuar kryeminsitrit Edi Rama një letër të hapur ku thekson se brezi I ri nuk intimidohet dhe se nuk pranon poshtërim e shantazh për të qëndruar në hije të pushtetit. Koçeku shkruan se populli shqiptar ka ndjenja të thella mirënjohjeje për SHBA-në dhe kjo protestë nuk u kundërvihet aspak atyre, por sistemit të brendshëm që është krijuar sipas saj ndër dekada mbi frikën dhe servilizmin. “Shqiptarët janë lodhë dhe nuk frymëzohen ma as nga ju, e as nga kasta e vjetër politike. Kjo iu ka çue në nji krizë të thellë legjitimiteti e cila vështirë se mund të tejkalohet pa pasoja a lëshime.”, nënvizon Koçeku ndërsa ka një përgjigje dhe për të gjithë ata që e pyesin se pse nuk foli më herët. “Drejtuesit e grupit që lashë pas nuk e pranonin mendimin ndryshe, as debatin, as ndjeshmëninë morale. Madje ata me çdo mjet përpiqen t’ia marrin frymën edhe tentativës ma të vogël për me qenë ndryshe, a me mendim të lirë.”, thotë Koçeku duke argumentuar se armiqtë e vendit nuk kanë qenë thuajse të jashtëm ashtu siç qeveria, sipas saj, po përpiqet që t’I pikturojë.