Largimi i Marjana Koçekut nga Partia Socialiste, për ata që i kanë ndjekur nga afër zhvillimet dhe debatet në mbledhjen e mbyllura të grupit parlamentar të PS nuk ishte një rrufe në qiell të hapur. ‘Neomalësorja’, siç njihet 26 vjeçarja në rrjetet sociale ka qenë një prej emrave të kritikuar nga kryesocialisti Edi Rama dhe kreu i grupit parlamentar, Taulant Balla për qëndrimet e mbajtura kohët e fundit, në parlament dhe jashtë parlamentit. Koçeku është kritikuar për qëndrimet e mbajtura për prishjet e ndërtimeve pa leje në Theth dhe për Rrjollin dhe se shpesh ka ndarë qëndrime të përbashkëta me deputetët e opozitës në Qarkun e Shkodrës.