Të tjera detaje janë mësuar në lidhje me ngjarjen e rëndë të shënuar në Korçë pasditen e të enjtes, ku nënë e bijë u gjetën të vdekura në banesë në lagjen 17. Eleni dhe Ornela Vangjeli 75 vjeç dhe 54 vjeç dyshohet se kanë ndërruar jetë që prej ditës së dielë, kur kanë humbur dhe kontaktet me të afërmit. Djali i të moshuarës, njëkohësisht vëllai i Ornela Vangjelit jashtë kamerave, ka treguar se ditën e shtunë ka qenë hera e fundit që ka biseduar me të motrën. Po atë ditë vajza ka çuar në spital nënën për shkak se kishte oksigjenin e ulët. Mjekët i kanë thënë që ta shtrojnë të moshuarën, por vajza nuk ka pranuar ta shtrojë në spital. Prej se janë kthyer në banesë nuk dihet asgjë se çfarë ka ndodhur. I biri i të moshuarës, i cili jetonte dhe punonte në Greqi, pasi nuk ka mundur të lidhet në telefon me to, u nis për Shqipëri, për t'u përballur me fatkeqësinë. Dyshohet se 54 vjeçarja e cila ishe me profesion mësuese në Vithkuq të ketë ndërruar jetë nga ataku kardiak, dhe më pas nëna e saj Eleni Vangjeli 75 vjeç, duke qenë e paralizuar nuk ka mundur të marrë ilaçet, dhe ka ndërruar jetë. Të ndjerat nuk kanë shenja dhune në trup, por Pritet të bëhet ekspertiza mjeko ligjore për të zbardhur plotësisht rrethanat