Të paktën 101 persona rezultojnë të zhdukur dhe 78 të plagosur pas një sulmi nga një nëndetëse mbi një anijeje luftarake iraniane në brigjet e Sri Lankës. Ministria e mbrojtjes e Sri Lankës tha se po kërkonte në det për pjesëtarët e ekuipazhit të IRIS Dena, e cila u fundos rreth 40 km në jug të ishullit. "Po vazhdojmë kërkimet, por ende nuk e dimë se çfarë ka ndodhru me pjesën tjetër të ekuipazhit", tha një zyrtar. Mbetet e paqartë se kush qëndron pas sulmit ndaj anijes, e cila sipas burimeve tani është fundosur. Ministri i Jashtëm i Sri Lankës tha se 32 marinarë iranianë "të lënduar rëndë" u dërguan në një spital të madh afër kryeqytetit. Fregata me 180 pjesëtarë të ekuipazhit lëshoi një thirrje për ndihmë të mërkurën në mëngjes. Dy anije të marinës së Sri Lankës dhe një avion u angazhuan për operacionin e shpëtimit. Qeveria nuk ka sqaruar nëse anija u bombardua si pjesë e sulmeve të SHBA-së dhe Izraelit kundër Iranit. Një zëdhënës i marinës së Sri Lankës tha se operacioni i saj ishte në përputhje me detyrimet detare të vendit. "Ne iu përgjigjëm thirrjes së emergjencës sipas detyrimeve tona ndërkombëtare, pasi ngjarja ndodhi brenda zonës sonë të kërkim-shpëtimit në Oqeanin Indian", tha zëdhënësi. Si marina e Sri Lankës ashtu edhe forcat ajrore kanë refuzuar të publikojnë pamjet e operacionit të shpëtimit sepse përfshinin trupa ushtarake të një shteti tjetër. Kjo vjen ndërsa lufta SHBA-Izrael me Iranin hyri në ditën e saj të pestë, me Izraelin që nisi një "valë" masive sulmesh në Iran. Irani ka bombarduar bazat amerikane në të gjithë Lindjen e Mesme në sulme hakmarrëse pas vrasjes së Ajatollah Ali Khamenei të shtunën gjatë Operacionit Epic Fury.