Shembja e një masivi kromi në hyrje të Minierës në qytetin e Bulqizës, ka bllokuar në galeri që nga ora 9 e mëngjesit të së mërkurës 61 vjecarin Muharrem Plaku. Oper4acioni për gjetjen e tij vazhdon, pavarësisht se ende nuk ka asnjë rezultat. Kërkimi sipas zyrtarëve është i vështirë edhe pse në minierë ka mbërritur një ekip i inspektim-shpëtimit të minierave. Ekipet po gërmojnë në hyrjen e galerisë me gjatësi rreth 1 mijë metra dhe kanë nxjerrë që andej shumë materiale, por ende nuk ka asnjë shenjë të 61 vjecarit. Muharrem Plaku punonte prej 8 vitesh në këtë minierë dhe familjarët e tij po presin me ankth gjetjen e trupit. Shpresat për ta nxjerrë gjallë që andej sa vijnë e pakësohen ndërkohë që në ndihmë janë angazhuar edhe punonjësit e tjerë të minierës. Ndërkohë, ka ardhur edhe një reagim nga Partia demokratike për rastin. Anëtarja e kryesisë, Dhurata Cupi, shkruan në Facebook se lutet që minatori të dalë sa më shpejt nga nëntoka e pasur që mban mbi vete mijëra njerëz të varfër dhe bën përgjegjëse qeverinë për mos marrjen e masave për sigurinë e punëtorëve në punë.