Nëse papritur do të dëmtoheshin kolonat bazë të botës digjitale, kjo do të kishte pasoja shkatërrimtare për shumicën e njerëzve. Sipas paralajmërimeve të Organizatës së OKB‑së për Telekomunikacion, ITU, dhe Zyrës së Kombeve të Bashkuara për Reduktimin e Rrezikut nga Fatkeqësitë, vendet nuk janë të përgatitura për skenarë të tillë si dështimi masiv i satelitëve, ndërprerjet e energjisë elektrike apo këputja e kabllove nënujore. "Rreziqet kritike digjitale janë reale, të dokumentuara, sistemike por ato nënvlerësohen në masë të madhe”, thekson një raport. "Çfarë do të ndodhte nëse nesër telefonat celularë dhe interneti nuk do të funksiononin më, pagesat do të dështonin, spitalet do të humbnin të dhënat e pacientëve dhe paralajmërimet emergjente nuk do të mbërrinin kurrë?”, pyesin autorët e raportit. "E gjithë kjo tingëllon si fantashkencë, por mund të bëhet realitet”, vijon ai. Raporti flet për një "pandemi digjitale” dhe paraqet tre skenarë frikësues. I pari është një stuhi diellore si ajo e vitit 1859. Atëherë u prekën telegrafistët, pajisjet nxorrën shkëndija dhe zyrat u përfshinë nga zjarri. Në ditët e sotme do të prekej sistemi i navigimit, transaksionet financiare, rrjeti elektrik etj. Një i ftohtë ekstrem si në vitin 2003 në evropë, është skenari i dytë. Një kërkesë më e madhe për ftohje kufizon funksionimin e centraleve bërthamore. Një trafik më i ulët i anijeve për shkak të niveleve të ulëta të ujit mund të pengojë gjithashtu furnizimin me naftë dizel për gjeneratorët e energjisë rezervë. Do të prekeshin shumë qendrat e të dhënave që konsumojnë shumë energji, terminalet e pagesave nuk do të funksiononin dhe dyqanet do të mbylleshin. Edhe një shpërthim i madh vullkanik, si ai i Hunga Tonga, në vitin 2022, nën det, mund të shkaktojë dëme masive. Dhe ky është skenari i tretë. Shpërthimi do të mund të dëmtonte kabllo të rëndësishme nënujore, që do të conte në ndërprerje interneti me pasoja të rënda. E në këto kushte, zyrat e Kombeve të Bashkuara apelojnë për kapacitete analoge rezervë, që do të ndihmonin në përballimin dhe kapërcimin e ndërprerjeve digjitale.