Këshilli Prokurorial i Kosovës ka pezulluar përkohësisht nga detyra zyrtare prokurorin Beqë Shala, i arrestuar një ditë më parë nën dyshimet për korrupsion. Pezullimi i tij, sipas KPK-së do të jetë në fuqi deri në “përfundimin e procedurës penale”. Beqë Shala mbante postin prokuror në Departamentin e Përgjithshëm të Prokurorisë Themelore në Prizren. Shala u arrestua me kërkesë të Prokurorisë Speciale të Kosovës, brenda në zyrën e tij dhe më pas iu caktua masa e ndalimit prej 48-orësh. Gjatë aksionit të 27 tetorit, hetuesit kryen bastisje në zyrën dhe shtëpinë e tij. “Gjatë bastisjes janë sekuestruar prova materiale që do të shërbejnë gjatë procedurës hetimore penale”, deklaroi Prokuroria Speciale pas aksioneve. Sipas mediave në Kosovë, po kryhen hetime për Shalën dhe posedohet një video-inçizim I prokurorit duke pranuar ryshfet.