Dy shtetasit egjiptianë, njëri drejtues i autobetonieres dhe tjetri pasagjer, të cilët humbën jetën në aksidentin e së mërkurës në rrethrotullimin e Saukut, në autostradën Tiranë-Elbasan, nuk ishin pajisur me leje drejtimi shqiptare dhe as me Dëshmi të Aftësisë Profesionale për profilin “Automakinist”. Sipas Drejtorisë së Përgjithshme të Transportit Rrugor, dy viktimat nuk ishin pajisur me dokumentacion të nevojshëm për drejtimin e automjeteve, e po ashtu Shqipëria nuk ka marrëveshje reciprociteti me Egjiptin, ndaj pretendimet se dy shtetasit e huaj ishin pajisur me dokumentacion shqiptar cilësohen të pavërteta. Por pyetja që ngrihet është se si ka mundësi që dy egjiptianët po lëviznin me një mjet të tonazhit të rëndë në rrugë? Pikërisht këtu dhe prokuroria me siguri do të verifikojë, jo vetëm shkaqet teknike të aksidentit, por edhe procedurat e rekrutimit, dokumentacionin e punësimit dhe respektimin e legjislacionit që rregullon transportin rrugor dhe sigurinë në punë. Sipas Kodit Rrugor një shtetas egjiptian mund të drejtojë mjet si vizitor vetëm në kushtet e parashikuara nga ligji, ku ai duhet të ketë një leje ndërkombëtare drejtimi që pranohet për një periudhë të kufizuar, por jo që të punësohet si shofer, e mbi të gjitha për mjete të rënda të kategorive C, CE apo D.