Revolucioni i Flamingove e ka shndërruar Shqipërinë në një arenë të vogël ku anti-Trumpistët globalë përplasen me presidentin amerikan. Kështu deklaron kryeministri Edi Rama, në një intervistë për Corriere della Serra. Rama: "Emri Trump nuk është thjesht emri i një investitori në këtë histori: është burimi më i madh në botë i zemërimit dixhital. Kudo që shfaqet Trump, ushtritë politike, mediatike dhe dixhitale pro dhe kundër tij aktivizohen automatikisht. Për shkak të këtij projekti, Shqipëria është bërë papritmas një arenë e vogël ku anti-Trumpistët globalë përplasen me Trumpin, ndërsa debati i vërtetë shqiptar mbi mjedisin, zhvillimin dhe ligjin shpesh mbytet nga kjo zhurmë e importuar. Kjo nuk zhvlerëson asnjë qytetar të sinqertë që proteston. Por unë kam detyrë të bëj dallimin midis qytetarit që kujdeset për natyrën dhe fabrikave të histerisë që kërkojnë ta përdorin Shqipërinë si skenë për betejat e tyre." I pyetur nëse protesta dyzet ditore poshtë zyrës së tij, do e shtynte shefin e ekzekutivit drejt dorëheqjes, Rama u shpreh se demokracia nuk funksionon me ultimatume. Rama: " Shqetësimi im është imazhi i rremë i krijuar nga histeria dixhitale: sikur Shqipëria të ishte në kaos, sikur të mos kishte institucione. Kjo nuk është e vërtetë. Reagimi popullor duhet të dëgjohet. Por shteti nuk mund të qeveriset nga telekomanda e rrjeteve sociale. Nëse çdo proces ndalet sapo të lindë një stuhi dixhitale, atëherë nuk kemi më ligj, nuk kemi më ekonomi, nuk kemi më institucione. Kemi vetëm frikë. Dhe frika nuk është politikë publike. Në një demokraci, dorëheqjet nuk vendosen nga megafonët, por nga institucionet dhe qytetarët përmes votimit. Unë kam një mandat të qartë. Kushdo që mendon se duhet të largohem ka të drejtë të organizohet, të garojë dhe të fitojë zgjedhje. Kjo është demokraci. Ultimatumi nuk është demokraci.”