Një aksion i Policisë së Tiranës ka shënjestruar mjetet luksoze në rrugët e kryeqytetit, ku gjatë kontrolleve janë verfikuar dokumentacionet për 61 prej tyre, pesë prej të cilave janë shoqëruar në mjediset e drejtorisë së policisë për verifikime të mëtejshme. Policia thotë se gjatë kontrolleve janë verifikuar 82 shtetas me precedentë penalë në fusha të ndryshme, kryesisht në atë të narkotikëve, ndërsa janë shoqëruar gjashtë shtetas. Të shoqëruarit janë persona të cilëve policia gjatë kontrolleve në mjetet luksoze që drejtonin u ka gjetur lëndë narkotike hashash dhe kokainë, shkopinj bejsbolli, shkopinj metalikë, apo kanë qenë në timon në gjendje të dehur. Sendet e mësipërme, thotë policia, janë sekuestruar në cilësinë e provës materiale, teksa shton se operacioni i ndërmarrë nga Shqiponjat dhe Policia Rrugore është në kuadër të planit të masave për goditjen e paligjshmërisë dhe rritjen e parametrave të sigurisë.