Tani rusët kanë mall për omletën. Cmimi i vezëve në rusi është rritur me 42,4 për qind brenda vetëm një viti sipas agjencisë ruse të statistikave, Rosstat, dhe kjo e dhënë alarmante duket se po rrezikon të zhdukë nga tavolinat e festave edhe sallatën ruse. Por nuk janë vetëm vezët...rusët kanë shfaqur shqetësim edhe për rritjen e cmimeve të ushqimeve të tjera bazë cka edhe nxjerr në pah gjendjen aspak të mirë të ekonomisë së vendit, të goditur nga sanksionet perëndimore, ndërkohë që presidenti Vladimir Putin kërkon një mandat të pestë në detyrë. Vetë Putin, në vazhdimësi ka ngritur në qiell qëndrueshmërinë e ekonomisë ruse përballë sanksioneve, por në të vërtetë, fuqia blerëse e rusëve po tkurret dhe inflacioni është rritur me 7.5 për qind këtë vit. Dhe rritja e cmimit të vezëve, nuk mund të vinte në një kohë më të keqe se kjo, pasi vezët janë përbërësi kryesor i shumë pjatave tradicionale ruse.