Estonia akuzoi Rusinë për shkeljen e rregullave ndërkombëtare të hapësirës ajrore duke ndërhyrë në sinjalet GPS dhe ministri i jashtëm i vendit baltik tha se do ta trajtojë këtë çështje me partnerët e NATO-s dhe Bashkimit Evropian. Finnair njoftoi të hënën për pezullimin e përkohshëm të fluturimeve për në pjesën lindore të vendit, për një muaj, për shkak të problemeve të vazhdueshme me GPS-in, që penguan dy avionë të ulen. Linja ajrore finlandeze tha se nuk e dinte se nga e kishte origjinën ndërhyrja, por në të kaluarën janë raportuar probleme të ngjashme pranë enklavës së Kaliningradit, që i përket Rusisë, dhe kufirit lindor të Finlandës me Rusinë. "Ndërhyrja në sistemin GPS në hapësirën ajrore të Estonisë nga Rusia ka ndikuar në aviacionin civil në rajon. Duke vepruar kështu Rusia shkel rregulloret ndërkombëtare," tha Ministri i Punëve të Jashtme të Estonisë, Margus Tsahkna në platformën X. As Kremlini dhe as Ministria e Mbrojtjes së Rusisë nuk i janë përgjigjur kërkesave për koment. Tsahkna tha se Estonia do ta trajtojë çështjen me vendet e tjera të NATO-s dhe BE-së dhe se ai e ka diskutuar tashmë atë me homologët e tij letonez, lituanez, finlandez dhe suedez. Në fillim të këtij muaji, Gjermania tha se Rusia qëndronte pas një serie problemesh që preknin aviacionin në rajonin e baltikut duke identifikuar kaliningradin, si burimin e këtyre problemeve.