Mijëra njerëz humbën jetën në Turqi dhe Siri si pasojë e tërmetit me magnitudë 7.8 të regjistruar orët e para të së hënës. Dhe në fakt, toka dridhet shpesh në këtë rajon dhe tërmetet me shumë viktima nuk kanë munguar edhe më parë. Por përse ndodh kjo? Korja e Tokës, paraqet një lloj enigme, është relativisht dinamike, që do të thotë e lëvizshme dhe përbëhet nga shumë pjesë individuale, nga disa pllaka gjigante oqeanike dhe disa pllaka më të vogla kontinentale. Shkencëtarët nuk janë të sigurt akoma se sa pllaka tektonike dhe më të vogla ekzistojnë. Këto pllaka lëvizin vazhdimisht, disa centimetra në vit. Kjo është krejt normale. Ato largohen nga njëra-tjetra, fërkohen mes tyre ose ndonjëherë shtyjnë njëra-tjetrën. Dhe si pasojë lëviz edhe pjesa e sipërme e tokës, e këto quhen lëvizje tektonike të pllakave. Edhe në tetor 2020, një tërmet tronditi detin Egje. Epiqendra ishte afër provincës turke të Izmirit, afër sipërfaqes së detit. Më shumë se 100 njerëz humbën jetën atëherë dhe më shumë se 1.000 u plagosën. Turqia ka qenë prej kohësh një territor interesant për studiuesit e tërmeteve. Ata kanë instaluar pajisje matëse në Turqi dhe monitorojnë situatën sizmike atje. Rezultatet tregojnë se rreziku i tërmeteve është shumë i lartë në të gjithë rajonin përreth Detit Marmara, në bregun e të cilit ndodhet Stambolli.