Presidenti I Shteteve të Bashkuara të Amerikës është shpresëplotë që sëshpejti do të arrihet një armëpushim në Gaza. Numri një i Shtëpisë së Bardhë bazohet në propozimin e ri të bërë ndaj dy palëve. Presidenti amerikan, Joe Biden tha të premten “jemi më afër se kurrë” për një armëpushim në Gaza pasi negociatat në Doha u pezulluan deri në javën e ardhshme. “Mund të kemi diçka. Por ne nuk jemi ende atje”, u tha Biden gazetarëve në Zyrën Ovale të Shtëpisë së Bardhë. “Jemi shumë, shumë më afër se sa ishim tre ditë më parë. Pra, mbani gishtat të kryqëzuar.” Shtetet e Bashkuara kanë paraqitur një propozim të ri për një armëpushim në Gaza në takimin e mbajtur në Doha të premten, me qëllim arritjen e një marrëveshjeje gjithëpërfshirëse që Izraeli dhe Hamasi do ta pranonin dhe do t’i hapnin rrugën një përfundimi gradual të krizës në Lindjen e Mesme. Një marrëveshje e mundshme do të parashikonte lirimin e pengjeve të mbajtura që nga sulmet e 7 tetorit në Izraelin jugor, në të cilat u vranë më shumë se 1200 njerëz dhe më shumë se 250 u morën peng. Egjipti dhe Katari e mirëpritën propozimin e SHBA-së me një deklaratë të përbashkët, duke theksuar se marrëveshja e re bazohet në themelet e propozimit të Joe Biden, të cilin Hamasi e ka kërkuar si bazë të çdo diskutimi.