Nga qyteti i Sarandës, zëvendëskryeministrja, Albana Koçiu njoftoi planin e masave të ndërmarra nga institucionet përgjegjëse për garantimin e një sezoni turistik të sigurt. Sinkron Koçiu: “Policia e Shtetit, Policia Rrugore, Policia Kufitare, të gjithë institucionet e tjera kanë nisur dhe kanë vendosur në zbatim një plan masash duke filluar nga: Shtimin e sporteleve dhe personelit në detyrë në pikat e kalimit kufitar. Përmirësimin e sinjalistikës rrugore. Caktimin e kalatave të dedikuara për anijet turistike. Lehtësimin e procedurave të kalimit të kufirit. Si dhe patrullim i vazhdueshëm i hapësirave bregdetare për të garantuar sigurinë në det nga mjetet lundruese. Shërbimi Kombëtar i Zjarrfikëseve është përgatitur gjithashtu për të përballuar çdo situatë, sidomos sa i përket mundësisë së vatrave të zjarrit. Shërbimi Kombëtar i Urgjencës, si dhe MSHMS, kanë zgjeruar më tej programin e tyre të suksesshëm të Qendrave Shëndetësore Verore.” Edhe ministri i turizmit, Blendi Gonxhja u ndal në jug, ku inspektoi plazhin e Jalës në Dhërmi. Në një postim në rrjetet sociale, ministri thotë se ka ende punë e sistemime për t’u kryer nga subjektet dhe entet vendore për t’u bërë gati për sezonin e plazhit dhe për një ambient sa më të rregullt estetikisht por dhe të pastër e në standard higjene.