Suedia ka ngritur dy avionë luftarakë për të ndjekur dy avionë bombardues rusë që fluturonin mbi Detin Baltik të martën, sipas Forcave të Armatosura Suedeze. Vendi i NATO-s ngriti në fluturim dy avionë luftarakë Jas 39 Gripen për të identifikuar dy bombardues Tu-22 Backfire, të cilët u shoqëruan edhe nga dy avionë luftarakë Su-27 Flanker. Rasti është i shtati brenda vetëm një jave në të cilin vendet e natos detyrohen të ngrenë avionët e tyre luftarakë për të ndjekur dhe monitoruar avionët rusë që shkelin rregullat. Rritja e këtyre rasteve mund të çojë në një përkeqësim të mëtejshëm të marrëdhënieve midis Rusisë dhe NATO-s. E ndërsa tensionet vetëm rriten, ministri rus i mbrojtjes, Andrei Belousov, paralajmëroi për luftë mes Rusisë dhe NATO-s brenda dekadës së ardhshme. Përveç Suedisë, edhe Finlanda reagoi pas pikasjes së bombarduesve rusë, duke ngritur në fluturim avionët luftarakë F-18 Hornet, që më pas u zëvendësuan nga holandezët F-35 Lightning II, në kuadër të forcës së policimit ajror të NATO-s. Jas 39 Gripen, i prodhuar nga Saab AB, është një avion luftarak suedez i aftë për të kryer operacione sulmuese dhe mbrojtëse dhe është i njohur për manovrimin e tij të lartë. Bombarduesit Tu-22 Backfire, të referuar edhe si Tu-22M3, janë në anën tjetër bombardues që mbajnë raketa me rreze të gjatë veprimi, që prodhohen që nga viti 1978 nga kompania ruse Tupolev. Versioni modern i bombarduesit u prodhua në vitin 2018.