Qindra studentë serbë kanë nisur një marshim nga Beogradi drejt qytetit të Novi Sadit, në kuadër të protestave të vazhdueshme që kanë tronditur vendin pas shembjes së çatisë në një stacion treni, që sipas tyre ishte rezultat i korrupsionit të thellë. “Qarkullimi në rrugën e marshimit do të pezullohet dhe do të ridrejtohet. Pjesëtarët e policisë së qarkullimit rrugor dhe të departamentit të rendit publik, si dhe autoambulancat dhe cisternat e ujit, do të vendosen përpara dhe pas kolonës”, tha ministri i Brendshëm, Ivica Daçiç. Zemërimi për shembjen e strehës në nëntor, që la të vdekur 15 persona, është përhapur në të gjithë vendin dhe me dhjetëra e mijëra njerëz kanë dalë në rrugë si pjesë e një lëvizjeje që kërkon më shumë përgjegjësi dhe drejtësi. Kryeministri Milos Vuçeviç dhe kryebashkiaku i Novi Sadit, Milan Gjuriç, dhanë dorëheqjen këtë javë, duke thënë se e konsiderojnë veten “objektivisht përgjegjës” për atë që ndodhi. Protestat kanë shtuar presionin mbi presidentin serb, Aleksandar Vuçiç, i cili po përballet me sfidën më të madhe që nga marrja e detyrës një dekadë më parë. Vuçiç tha një ditë më parë se partia e tij në pushtet do të vendosë brenda 10 ditëve të ardhshme nëse do të propozojë një qeveri të re, apo do të thërrasë zgjedhje të parakohshme parlamentare.