Komandanti i një grupi partizanësh rusë, kundër Vladimir Putinit, ka premtuar se do të rrëzojë regjimin e Kremlinit dhe do të drejtojë trupat e tij deri në Moskë. Luftëtari që po lufton krah Ukrainës, me nofkën Cezar, udhëheq legjionin Rusia e Lirë, të përbërë nga shtetas rusë, që kanë kryer kohët e fundit sulme kundër vendit të tyre. “Ne kemi kapacitete të mëdha”, thotë Cezari për The Times. “Kemi mortaja, mjete të blinduara, raketa stinger, sisteme anti tank dhe një njësi shumë efikase dronësh zbulimi”. Ai po ashtu tha se kishte edhe me mijëra kërkesa nga rusë të dëshpëruar për tiu bashkuar radhëve të tyre dhe për tu ngritur kundër Putinit në një revolucion që do të kulmonte me një sulm në Moskë. Legjioni misterioz thotë se qëllimi i tij është të ndërtojë një Rusi të lirë, të cliruar nga tirania e Kremlinit.