Sekretari i përgjithshëm i NATO-s, Jens Stoltenberg, do të qëndrojë në postin e tij të paktën edhe për një vit tjetër pasi aleanca ushtarake perëndimore njoftoi se kishte zgjatur mandatin e tij. Ish kryeministri Norvegjez është në detyrë në krye të NATO-s që nga 2014-ta dhe mandati i tij duhej të skadonte vitin e kaluar. Por, ai qëndroi në post gjatë trazirave të shkaktuara nga pushtimi rus i Ukrainës. Vendet anëtare të NATO-s duhej të zgjidhnin pasuesin e tij gjatë samitit të radhës të aleancës, në Vilnius të Lituanisë, më 11 dhe 12 korrik, por asnjë kompromis nuk u arrit. Para se mandati i stoltenbergut të zgjatej sërish, u përfolën si kandidatura të mundshme për zëvendësues të tij, sekretari britanik i mbrojtjes, Ben Uollas, apo edhe kryeministrja e danimarkës, Mette Frederiksen. Por duket se emrat e tyre nuk morën miratimin e presidentit amerikan, Joe Biden. Kjo është hera e katërt që mandati i Stoltenberg zgjatet, me aleancën që shpreson të mbetet në duar të sigurta deri në fund të agresionit të rusisë. NATO ka forcuar mbrojtjen në skajet e saj lindore, në një numër vendesh që kufizohen me Rusinë.