Izraeli vijon me bombardimet në veri të Gazës. Forcat ajrore izraelite goditën një zonë afër një prej spitaleve që operon në këtë zonë. Nga sulmi raportohen të paktën 29 viktima, përfshirë këtu dhe katë pjesëtarë të stafit mjekësor, thanë autoritetet palestineze. “Situata në dhe përreth spitalit Kamal Advan është “katastrofike”, tha drejtori i spitalit, Hussam Abu Safia që sqaroi se mes të vrarëve ishin dhe pesë fëmijë dhe pesë gra, raporton Associated Press. Ndërkohë vetë ushtria e Izraelit mohoi të ketë sulmuar brenda ambienteve të spitalit ndërsa sqaroi se në javët e fundit, “janë bërë përpjekje të koordinuara me organizatat ndërkombëtare për të transferuar pacientët, shoqëruesit e tyre dhe stafin mjekësor në spitale të tjera”. Spitali është sulmuar disa herë gjatë dy muajve të fundit qëkur Izraeli ndërmori operacionin ushtarak në veri të Gazës kundër Hamasit. Në tetor forcat izraelite bastisën spitalin me pretendimin se aty strehoheshin militantë. Lufta e Izraelit kundër Hamasit ka shkatërruar zona të mëdha të Gazës dhe ka bërë që 90 për qind e popullsisë prej 2.3 milionë banorësh e kësaj enklave të zhvendoset disa herë.