Forcat operacionale arrestuan një 61 vjeccar të shpallur në kërkim ndërkombëtar, i cili kërkohej prej 10 vitesh nga autoritetet italiane për kryerjen e disa veprave penale. Andrea Gjini alias Andrea Kuqja u arrestua në Belsh gjatë një operacioni të zhvilluar nga drejtoria e Forcës së Posaçme Operacionale, teksa ai do mbahet në paraburgim deri në kryerjen e procedurave për ekstradimin e tij drejt shtetit italian. Gjykata e Lucca-s (Itali) e ka dënuar atë në vitin 2016 me 15 vjet, 9 muaj e 18 ditë burg për veprat penale “Shfrytëzim prostitucioni”, “Trafikim i lëndëve narkotike” dhe “Plagosje”, të parashikuara nga Kodi Penal i Italisë. Operacioni për arrestimin e tij vjen në vazhdën e 85 operacioneve të tjera të kryera nga policia e shtetit për lokalizimin dhe arrestimin e personave të shpallur në kërkim ndërkombëtar, qoftë për ata që kërkohen nga autoritetet vendase apo edhe për personat që kërkohen nga shtetet e tjera. 61 vjeccari Andrea Gjini pritet të ekstradohet drejt Italisë pas kryerjes së procedurave nga të dyja vendet.