Këtë të hënë, Rusia dhe Ukraina do të përballen para Gjykatës Ndërkombëtare të Drejtësisë lidhur me pretendimet ruse se ai që e konsideron si operacion special, është bërë për të parandaluar një gjenocid. Ka qenë Ukraina ajo e cila solli këtë rast në Hagë disa ditë pasi nisi pushtimi rus më 24 shkurt të vitit të kaluar. Kievi argumenton se Rusia po shkel ligjin ndërkombëtar duke thënë se pushtimi justifikohet me gjenocidin e pretenduar në lindje të Ukrainës. Zyrtarët rusë vazhdojnë ta akuzojnë Ukrainën se po kryen gjenocid, teksa Kremlini kërkon që rasti të hidhet poshtë dhe kundërshton juridiksionin e Gjykatës Ndërkombëtare të Drejtësisë. Moska ka thënë se Ukraina po e përdor këtë rast për të fituar një vendim gjyqësor lidhur me ligjshmërinë e veprimit ushtarak të Rusisë, teksa pritet që seanca dëgjimore të zgjatë deri më 27 shtator. Kujtojmë se paraprakisht Ukraina ka një fitore ndaj Rusisë, ku gjykata ka kërkuar nga Rusia që të ndalë menjëherë veprimet ushtarake në Ukrainë. Po ashtu bëhet e ditur se në sencën e së hënës, do të ketë dëshmi nga 32 shtete të tjera dhe të gjitha do të mbështesin argumentin e Ukrainës se gjykata ka juridiksion për të vazhduar me këtë rast.