Nga Lossiemouth, një bazë e madhe ajrore britanike në veri të Skocisë, Boris Pistorius u nis për një fluturim zbulues mbi Atlantikun e Veriut. Me një avion Boeing 737 të Forcave Ajrore Mbretërore britanike, por të pilotuar nga një pilot gjerman. Ministri gjerman i Mbrojtjes ishte në gjendje të shihte se si nëndetëset ruse dhe anijet e dyshimta mund të zbuloheshin duke përdorur pajisje radari dhe pajisje të tjera shumë të ndjeshme. "Ne zbritëm mjaft ulët, në rreth 300 metra, dhe mund të shihnim anijet që canin dallgët e larta", tha ministri për DË pas fluturimit dy-orësh. Avioni zbulues detar Poseidon është menduar kryesisht për zbulimin e nëndetëseve ruse. Për ta, kjo është rruga më e shpeshtë nga porti i Murmanskut në Rusi në Atlantikun e Veriut. Fluturimi nuk zbuloi ndonjë nëndetëse, por ministri mund të shihte sinjale të lëshuara nga pjesa e pasme e Boeingut që mund të kapnin tingujt e motorëve të anijeve nga kilometra larg. Marina Gjermane do të marrë tetë sisteme të tilla moderne fluturimi për zbulim dhe mbikëqyrje. Forcat Ajrore Mbretërore Britanike, Marina Norvegjeze dhe Marina Amerikane tashmë i kanë në përdorim. Së bashku, këto shtete anëtare të NATO-s do të monitorojnë Atlantikun e Veriut dhe Detin Baltik. Sipas oficerëve të NATO-s, lëvizja e nëndetëseve ruse, pjesërisht me energji bërthamore dhe të armatosura me koka bërthamore, është rritur ndjeshëm vitet e fundit. "Është një kërcënim strategjik", tha një oficer që foli në kushte anonimiteti. Nëndetëseve u lejohet të zhyten në ujërat ndërkombëtare në kohë paqeje. Ato nuk kanë transponderë të integruar dhe pozicioni i tyre është i vështirë për t'u përcaktuar. Kjo është arsyeja pse NATO krijoi një rrjet sistemesh mbikëqyrjeje, shtylla kurrizore e të cilit përbëhet nga vëzhgues nga qielli. Qëllimi kryesor është të përcaktohet se sa afër brigjeve të shteteve anëtare të NATO-s janë rusët dhe nëse ata po kalojnë në ujëra kombëtare. Në kohë lufte, avionët P-8 janë gjithashtu të aftë për luftë kundër nëndetëseve sepse mund të lëshojnë torpedo të prodhuara në Britani.