Për dekada të tëra, pothuajse çdo shkencëtar ka pranuar se universi u krijua në një shpërthim gjigant të njohur si Big Bengu. Por një grup studiuesish tani pohon në mënyrë kontroverse se gjithçka që mendojmë për lindjen e kozmosit mund të jetë e gabuar. Në një punim të ri kërkimor radikal, Profesor Enrique Gaztanaga, i Universitetit të Portsmouthit dhe bashkautorët e tij kanë propozuar një teori të re që e quajnë 'Universi i Vrimës së Zezë'. Ata pretendojnë se universi u formua nga një përplasje gravitacionale, që formoi një vrimë të zezë masive e cila më pas 'kërceu' jashtë ose volli gjithcka mbante brenda. Profesor Gaztanaga pretendon se kjo teori mund të shpjegojë gjithçka që dimë për strukturën e universit pa pasur nevojë për ndonjë element ekzotik siç është energjia e errët. Është e rëndësishme të theksohet se teoria parashikon gjithashtu se hapësira duhet të jetë pak e lakuar dhe jo plotësisht e sheshtë siç sugjeron modeli i Big Bengut. Kjo është diçka që misionet aktuale të NASA-s, si ai i Euklidit, mund të jenë në gjendje ta konfirmojnë së shpejti, ndoshta duke ofruar një aluzion të fortë se teoria e Universit të Vrimës së Zezë është e saktë. Megjithatë, teoria e Universit të Vrimës së Zezë mund të ketë edhe disa pasoja të çuditshme për vendin e njerëzimit në univers. Sipas teorisë së Big Bengut, përpara se të krijohej universi siç e njohim ne, e gjithë materia që ekziston aktualisht ishte e paketuar në një pikë pafundësisht të dendur të quajtur 'singularitet'. Nga kjo pikë, rreth 13.8 miliardë vjet më parë, universi shpërtheu jashtë në një fazë zgjerimi jashtëzakonisht të shpejtë të njohur si inflacion kozmik.