Këshilli i Ministrave ka miratuar dy vendime të rëndësishme që reformojnë rrënjësisht mënyrën se si do të hartohen, koordinohen dhe monitorohen projektet e zhvillimit në të gjithë territorin e vendit. Në mbledhjen e qeverisë të kësaj të mërkure, ekzekutivi ka përcaktuar rregullat e reja për hartimin e dokumenteve strategjike të kohezionit, duke bërë njëkohësisht një shkrirje të strukturave drejtuese për të shmangur burokracitë. Planet e reja të zhvillimit do të ndahen në nivel Kombëtar, Rajonal dhe në atë të mbështetjes teknike. Sa I takon nivelit kombëtar Plani Kombëtar (PKZHRK) dhe Programi Operacional (POZHRK) do të hartohen nga Komiteti Kombëtar për Zhvillimin Rajonal dhe Kohezionin, si organ përgjegjës për të gjithë territorin. Ndërsa në atë rajonal planet do të hartohen nga bordet përkatëse të monitorimit, brenda kufijve territorialë të çdo rajoni zhvillimor. Ndërkohë Fondi Shqiptar i Zhvillimit (FSHZH) do të luajë rolin e sekretariatit teknik, duke ofruar gjithë mbështetjen administrative për përgatitjen e këtyre dokumenteve. “KKZHRK-ja drejtohet nga Zëvendëskryeministri, në cilësinë e kryetarit. Përbërja e KKZHRK-së do të jetë e njëjtë me përbërjen e këshillit drejtues të Fondit Shqiptar të Zhvillimit (FSHZH). Anëtarë të KKZHRK-së janë anëtarët e këshillit drejtues të FSHZH-së.”, thuhet në vendimin e qeverisë. Ndryshimet e reja synojnë të harmonizojnë politikat e zhvillimit rajonal me kërkesat që burojnë nga procesi i anëtarësimit të Shqipërisë në Bashkimin Evropian dhe politikat e saj të kohezionit.