Në labirintin e politikës italiane, Silvio Berluskoni ishte një lider i pazakontë, një njeri që shkriu biznesin dhe jetën publike si askush tjetër. Personaliteti i rrallë i tij preku telat e elektoratit italian që vazhdoi ta mbështeste atë pavarësisht akuzave për korrupsion dhe mashtrime. Katër herë ai ishte kryeministër dhe në fund të secilës herë dukej sikur karriera e tij politike kishte mbaruar...por ai ia dilte të rikthehej...Nëntë vite pasi u ndalua nga postet publike, pasi u shpall fajtor për mashtrim me taksat, Berluskoni u rikthye në parlament, ose më saktë në senat në shtator 2022. Por, ishte më shumë jeta e tij private, mania për ta rrethuar veten me femra të reja e të bukura, si edhe skandalet seksuale ato që pushtonin faqet e para të gazetave në të gjithë botën. Berluskoni, ishte manjat mediash, pronar i një klubi futbolli dhe biznesmen miliarder, që nuk hoqi dorë asnjëherë nga politika dhe ndihmoi në përcaktimin e imazhit të italisë për dekada. Ai lindi në një familje të klasës së mesme në Milano, më 29 shtator 1936. Që kur ishte student tregoi se ishte i aftë të bënte para. Ndërsa studionte drejtësi në universitet ai ishte basist në një grup muzikor, fitoi reputacion si këngëtar duke punuar në klube nate dhe krocera ndërsa i shiste ese studentëve të tjerë. Pas diplomimit krijoi kompaninë e tij të ndërtimit, Edilnord. Në 1973 krijoi një kompani lokale televizioni kabllor të quajtur telemilano. Katër vite më vonë ai ishte pronar i dy kanaleve televizive dhe një studioje në milano.