Në Shqipëri është duke u diskutuar Kodi i ri Penal, i cili për herë të parë përfshon edhe konceptin e konsfiskimit të pasurive të personave të tretë. Aktualisht në ligjin anti-mafia, konfiskohen pasurite e njerëzve të lidhur me botën e krimit, apo të tjerëve të lidhur ngushtë me ta. Megjithatë në kodin e ri, neni 74 parashikon konfiskimin e pasurive edhe për persona të tretë, nëse atjo u është kaluar nga autorë të veprave penale. Gjithashtu do të konfiskohen edhe pasuri të personave të tretë, të cilët e kanë blerë nga autorë të veprave penale, edhe pse e kanë ditur se tjetërsimi i pasurisë po bëhej për të shmangur konfiskimin. “Konfiskimit i nënshtrohen edhe produktet ose pasuritë e tjera, vlera e të cilave u korrespondon këtyre produkteve, të cilat janë transferuar tek persona të tretë nga autori i veprës penale, ose që personat e tretë kanë blerë drejtpërdrejt ose tërthorazi nga autori, me kushtin që personat e tretë të kenë ditur ose duhej të kishin ditur që qëllimi i tjetersimit të pronësisë ose i blerjes ka qenë shmangia e konfiskimit, duke u bazuar në fakte dhe rrethana konkrete, si dhe kur transferimi ose blerja është bërë falas apo kundrejt një vlere shumë herë më të vogël sesa vlera e tregut”, thuhet në një nga pikat e nenit 74. Kodi i ri Penal është në fazë diskutimi në komisionet parlamentare dhe pritet të kalojë për miratim në Kuvend.