Dy efektivë të forcave “Shqiponja” kanë mbetur të plagosur gjatë një operacioni për kapjen e një personi të shpallur në kërkim ndërkombëtar në Dibër. Efektivët e policisë dyshohet se kanë rënë nga një lartësi, teksa ishin në ndjekje të Klodian Llomit, njohur edhe si Klodian Mazari. Sipas të dhënave paraprake, oficeri i policisë Gentjan Meda dyshohet se ka pësuar goditje në kokë. Ai është transportuar me helikopter drejt Spitalit të Traumës në Tiranë për ndihmë të specializuar mjekësore. Ndërkohë, kolegu i tij Bilala Gjapi ka pësuar thyerje në këmbë. Të dy efektivët mësohet se janë hedhur nga një mur me qëllim për të kapur dhe neutralizuar të shumëkërkuarin, i cili tentoi të arratisej. Pavarësisht incidentit, operacioni u finalizua me arrestimin e Klodian Llomit, i cili rezulton i dënuar me 6 vite e 7 muaj burg për veprat penale “Organizatë kriminale”, “Trafikim i lëndëve narkotike” dhe “Shfrytëzim prostitucioni”.