Ish presidenti i Bashkimit Sovjetik, Mikhail Gorbachov, është shtruar në spital ku i është nënshtruar dializës. Lajmi është bërë i ditur nga mediat ruse sipas të cilëve, politikani 91 vjecar, që ka qenë edhe sekretar i përgjithshëm i partisë komuniste sovjetike, është në gjendje jo të mirë shëndetësore. Që Gorbachov nuk ishte mirë, kjo ishte bërë e ditur që në mars nga Dmitry Muratov, kryeredaktor i gazetës së pavarur ruse Novaya Gazeta, në shënjestër të censurës së Moskës. “E kam vizituar Gorbacovin në spital. Ai ka mbushur 91 vjec tani dhe nuk është mirë por më ka konfirmuar se duhet bërë gjithcka që është e mundur për të ndaluar kërcënimin e një lufte bërthamore”, kishte thënë ai. Në 2016-ën, ish presidentit sovjetik i ishte vendosur edhe një aparaturë në zemër. Në të njëjtin vit, Gorbachov kishte thënë edhe se ndjente turp për veprimet politike të presidentit vladimir Putin dhe kryeministrit të asaj kohe Dmitry Medvedev, që së fundmi është bërë protagonist i kërcënimeve të papërmbajtshme ndaj perëndimit. Ish lideri sovjetik kishte thënë se zgjedhjet në Rusi, nga 1990-ta e pas, kishin qenë më pak të lira se sa në epokën sovjetike dhe ishte e papranueshme që shërbimet e sigurisë të dominonin në vend.