Irani sulmoi me raketa atë që ai tha se ishte “seli e spiunëve izraelitë” afër Konsullatës amerikane në Irbil të Irakut, dhe mori në shënjestër objektiva të lidhura me grupin militant, Shteti Islamik, në veri të Sirisë. Katër civilë u vranë dhe gjashtë të tjerë u plagosën pas sulmit të së hënës mbrëma afër Konsullatës amerikane në Irbil, që është edhe selia e rajonit gjysmë-autonom kurd, sipas këshillit të sigurisë së qeverisë rajonale kurde. Garda Revolucionare Islamike e Iranit tha përmes një deklarate se goditi selinë e shërbimit të inteligjencës së Izraelit, Mossad, në rajonin kurd të Irakut. Në një deklaratë tjetër, Garda tha se lëshoi një numër të raketash balistike mbi “shtabet terroriste”, përfshirë shënjestra të shtetit islamik në Siri, duke shtuar se i ka shkatërruar ato. Izraeli nuk ka pranuar menjëherë sulmin në Irbil dhe Ambasada izraelite në Uashington nuk ka bërë komente për pretendimet iraniane se ka shënjestruar selinë e Mossad-it. Sulmet iraniane vijnë në një kohë të tensioneve të rritura në rajon dhe frikës se lufta në Gazë mund të zgjerohet. Që nga shpërthimi i luftës mes Izraelit dhe Hamasit më 7 tetor, milicitë e mbështetura nga Irani në Irak pothuajse në baza ditore kanë kryer sulme me dronë nga bazave në Irak dhe Siri ku gjenden të vendosura trupat amerikane. Këto sulme, sipas milicive, po kryen në shenjë hakmarrjeje ndaj mbështetjes që Uashingtoni i jep Izraelit dhe në përpjekje që të detyrojnë trupat amerikane të largohen nga rajoni. SHBA ndërkohë ka dënuar sulmet e iranit në Irbil duke thënë se ato minojnë stabilitetin e irakut. Ndërsa sulmet e iranit në veri të sirisë, vijnë pasi shteti islamik mori përsipër më herët përgjegjësinë për shpërthimet në ceremoninë e përvjetorit të vrasjes së gjeneralit iranian Kasem Soleimani, ku humbën jetën të paktn 84 persona.