Rreziku i dallgëve të një tsunami në Paqësorin jugor, fatmirësisht kaloi dhe paralajmërimet e lëshuara janë tërhequr tani pasi një tërmet me magnitudë 7.7 u regjistrua të premten në juglindje të ishujve Lojalti, në territorin francez të Kaledonisë së re. Qendra e paralajmërimit për tsunami në Paqësor, tha se kërcënimi për tsunami ka kaluar tashmë. Më herët ajo kishte paralajmëruar për mundësinë e përplasjes së dallgëve të mëdha në 26 rajone në paqësorin jugor. Vanuatu tërhoqi një paralajmërim për banorët që të kërkonin terrene më të larta dhe tha se një tsunami shkatërrimtar nuk pritej tashmë të ndodhte. Pas tërmetit, byroja meteorologjike e australisë lëshoi një alarm për tsunami në ishullin Lord Houe, në brigjet e saj lindore dhe paralajmëroi 450 banorët e tij të largoheshin sa më shumë që të mundeshin nga brigjet. Më pas, edhe ky paralajmërim u tërhoq.