Të shtunën, më 2 dhjetor 2023, tregu i Krishtlindjeve në Göppingen të Gjermanisë u mbyll, pasi një person i panjohur kërcënoi me telefon me sulm. Organizatorët në qytetin me 60.000 banorë në lindje të Shtutgartit dhe policia u përgjigjën shpejt, ndërsa vizitorëve iu kërkua të largoheshin nga ky vend. Në qendër të qytetit shiheshin policë të armatosur deri në dhëmbë, u kontrollua zona e tregut, por nuk u zbulua asnjë mjet i rrezikshëm. Policia tashmë është në kërkim të personit që ka bërë këtë telefonatë. Nëse policia gjen personin që ka telefonuar, ai do të përballet me pasoja serioze. Kohët e fundit, policia ka zbuluar me sukses persona që telefonojnë në mënyrë anonime apo dërgojnë mesazhe kërcënuese me e-mail, ndonëse ndonjëherë kjo nuk ka qenë e lehtë. Policia paralajmëron, se nuk duhet bërë shaka me këto gjëra, sepse pasojat janë të rënda dhe do të dënohet ashpër ndërhyrja e policisë dhe kufizimi i sigurisë së qytetarëve. Sipas DË, në komisariatet gjermane të policisë, si dhe zyrat dhe institucionet e mbrojtjes së rendit kushtetues, nervozizmi është i lartë. Në veçanti pas sulmit të Hamasit ndaj Izraelit më 7 tetor dhe ndërhyrjes së ushtrisë izraelite në Rripin e Gazës, autoritetet gjermane të sigurisë kanë vënë re se skena islamike radikale dhe e gatshme për dhunë po bëhet edhe më e radikalizuar. Edhe ata që nuk kanë asnjë lidhje me Hamasin, por e konsideronin veten anëtarë të të ashtuquajturit Shteti Islamik ose Al Kaedës pothuajse të harruar, tani ndjejnë një frymëzim të ri për të luftuar, thonë analistët. Sulmi terrorist islamik në Paris, ku një gjerman mbeti i vrarë të shtunën, duket se konfirmon vlerësimet e autoriteteve të sigurisë.